飛毛腿

上星期六，一個老味戲劇界頒獎典禮 （ Tony Awards ）
老戲骨羅拔迪尼路，一出場第一句就炒蝦拆蟹 ：




都話㗎啦，講嗌交，床破未驚過，絕唔肯忍氣吞聲
於是，搞掂同肥仔金會談呢場大戲後
即刻反擊迪尼路 ：
迪尼路呢條低 B 佬
拍戲果時俾人打到腦殘 ～ 指佢果部電影狂牛 （ Raging Bull），佢飾演一個拳師
有 D 似史泰龍嘅 Rocky

飛毛腿

老床反口覆舌，講乜都轉下頭就唔算數
本來，老味從來就不知信用為何物
但好似老床咁朝秦暮楚，快過四川絕技變臉，就比較少見
同老中裝模作樣咁傾過幾輪，達成協議暫停貿易戰
人人都以為貿易戰可能告一段落，下回再見
不過，似乎老中都唔係好信老床呢個班子
第三輪談判後，老中出一份聲明，其中一段就咁講 ：

“中美之间达成的成果，都应基于双方相向而行、不打贸易战这一前提。如果美方出台包括加征关税在内的贸易制裁措施，双方谈判达成的所有经贸成果将不会生效。”

人人都以為雙方達成協議，唔打貿易戰
老中會幫襯老味，買多 D石油天然氣能源丶農產品
果然，老床同肥仔金會面後，覺得唔駛再要老中幫忙撳實肥仔金
於是老床就推出一份關稅名單，其中 340億美籠商品要加關稅，其餘160億商品再徵詢各界意見
幾個鐘頭後，老中商務部半夜推出一份反擊名單，同樣徵收老味進口商品關稅
仲有，以前雙方傾掂嘅嘢通通無效
～ 可能包括舊年老床訪華時簽落嘅 2,500億美籠嘅買賣協議
～ 老中冇特別講明包唔包括呢 2,500億美籠，可能留作籌碼同老味 show hand

我哋剛過完端午節
老床可能瞓唔著，夜晚係身發推文 （ 我哋嘅時間係 19號 ）
老床㷫烚烚咁話要加碼，再向2,000億美籠嘅中國商品加徵關稅
而老中唔准還手，否則再加另外 2,000 億美籠，總數去到 4,500億咁話
落共係嚇大嘅，咩嘴炮未見過，咩刀光劍影丶血肉横飛嘅場面未見過 ？
有人好懷疑，刀頭舐血嘅係老毛老鄧年代
而今日呢班老共揸 fit 人未見過兵荒馬亂嘅日子，會唔會俾老味嚇一嚇就腳軟 ？

但你睇下，對老味退讓嘅人又咩下場 ？
卡達菲丶薩達姆嘅墳頭長草三尺高
伊朗所謂嘅核武十劃未有一撇，核爆都未試爆過，俾老味全面封殺
終於低頭停止繼續提煉，簽訂棄核協議
但老床一上場，就搣爛張伊朗核協議，唔認數
同樣俾老味全面封殺嘅朝鮮，啋你老味都傻，核爆一鑊又一鑊
老味眼光光，炒蝦拆蟹，就係唔敢郁手
你估老味真係怕肥仔金有牙，唔敢郁佢 ？
講到尾，因為朝鮮背後有老中呢個巨無霸
外交部長幾年前同當時嘅聯合國秘書長潘基文通電話時講過 ： 不容允許在中國的家門口生事

今日老味直接對準老中嘅利益郁手
如果老中退縮，其他人知道你銀樣蠟槍頭，咁就牆倒眾人推，想唔死都難

飛毛腿

舊年肥仔金好似食咗春藥咁
爆完原子彈 （ 其實佢哋未必有能力去到核彈嘅水平），但原子彈都係彈
跟住搏命咁放飛箭，射完一隻又一隻火箭
最後仲成功咁射一隻遠程火箭火星 10號
火箭就係搭載核彈頭嘅工具
肥仔金興奮到孭起個火箭專家  




床破睇見就眼冤，替肥仔金改個花名叫火箭人 （ Rocket Man ）
兩條友隔空駡戰，互吐口水
鬧下鬧下，肥仔金話自己枱面就有核武按鈕，隨時可以炸九你老味
床破話 ： 挑，我枱面都有核武按鈕，比你個更大更堅
轉眼幾個月，兩條水火不容嘅對頭 （ 其實老床好失身份，三億幾人口嘅世界老大跟又窮又細，得二千幾萬人口嘅朝鮮做對頭）
嚟一個 180度嘅急轉灣，老床興高彩烈咁話要同肥仔金見面
前幾個月仲互吊，老床鬧肥仔金係又肥又矮嘅 little rocket man
幾個月後，一見面，老床 ： 肥仔，你好嘢  

飛毛腿

老床善變，飄忽無定，不可捉摸
好似同肥仔金嘅戲劇性變化
好多人都估唔到

今日同老中紮晒馬，一副勢成水火嘅姿態
但會唔會又嚟一個出人意表，劇情大反轉
有錢大家搵，無謂兩敗俱傷 ？

下回再探討

飛毛腿

回復  飛毛腿


好多香港評論話美朝関係轉好,直接對話、對老中來說是一個惡夢。因為老味可能又多咗個對老 ...
public 發表於 2018-6-24 12:01 AM

我一向好少睇，近年完全唔睇鄉港口水佬嘅所謂評論
所以唔清楚佢哋噏乜春
鄉港口水佬嘅固定思維就係老味天下無敵，老味代表正義，同老味作對嘅國家一定係壞蛋
含蝦燦將中英聯合聲明吹到有咩國際法律約束力， 嗱
當年嘅京都議定書就話有法律約束力，簽署國有法律義務遵守減排目標
小布殊一上場，就話克淫頓簽落嘅京都議定書唔算數，作廢
奧黑柴簽落嘅巴黎氣候協議，有百幾個國家簽署，聯合國備案背書，床破上任後又話唔玩嘞，你哋玩啦

伊朗核協議六個國家花費六年時間去講數
六個國家中包括聯合國安理會五個常任理事國，另加德國 ～ 未計當事國伊朗
達成協議後，聯合國背書，安理會通過取消對伊朗制裁
有哂法律依據喇啩 ？
老味一句唔算數，協議作廢，恢復對伊朗制裁
今次冇聯合國議案制裁伊朗
但老味話我制裁伊朗，你哋都唔准同伊朗做生意
邊個同伊朗做生意，我就泡製佢，罰到佢殘
中興就係咁賴嘢

老味講嘢就好似放屁咁，完全冇信用可言
肥仔金同韓國文在寅會面時，放聲氣話棄核可以傾
老床嘅幕僚即刻不可一世咁開出條件，話要按照利比亞模式
所有核設施要完全摧毀，所有核武科研專家技術員要移民外國，唔准留晌朝鮮
你滷味，你唔提利比亞仲好，睇下卡達菲點樣曝屍街頭，全家幾乎被滅門
只要肥仔金唔係弱智，點會信任老味 ？去投靠老味就係自殺
老味應承乜都係假，老味可以一夜之間就反口

事實証明肥仔金唔係傻嘅，好明白邊個先係佢嘅可靠嘅靠山
所以三個月內，肥仔金三次訪問中國
跟床破會面前兩次到中國
會面後，一個星期左右又再到中國訪問

飛毛腿

明日係 7月 6日
時區不同，北京時間比華盛頓快 12小時
北京夜晚，就係華盛頓 7月 6 日早上
老味向老中 340億美籠 商品加徵關稅生效日期
睇嚟老味唔會縮手
老中亦唔會讓步，會即時向同等數額嘅老味進口商品加關稅
貿易戰就展開

貿易戰一開打，就唔會短時間内結束
除非老味國內反對力量令床破頂唔順
但暫時見唔到呢種跡象
貿易戰係雙輸局面，唔會有是但一家毫髮無損
睇下邊個捱得住痛，邊個傷到頂唔順求和
我個人認為頂唔順要求和嘅極大可能唔會係老中
拭目以待

飛毛腿

十九幾廿年前，有一個朋友去老味度旅遊
佢食煙嘅，去開超級巿場順手買返個打火機用
就係用到冇氣就掉，唔可以再入氣果種，果時鄉港賣兩蚊一隻
佢晌超市攞起隻打火機睇下價錢，又係兩蚊一隻，係美籠兩蚊
嚇到佢拿拿聲放低，買唔落手
今日晌大陸，普通小商店有賣呢種打火機，一隻賣一蚊人仔
我估晌老味度，今時今日開到成行成市嘅一蚊店有得賣呢種打火機
大概會賣一蚊美籠一隻
同樣一隻打火機，來貨價應該差唔多，老味訂嘅貨量大， 仲應該平 D
不過老味嘅貨要加上運費
無論點，老味嘅零售成本最多係大陸小商店嘅一倍，但賣價就六倍幾

以前睇過 D財經報導
講老味嘅採購商點樣壓價，佢哋恃住自己採購量大，鏈價鏈到盡
好似話三幾蚊美籠一打毛巾，仲要係純棉毛巾喎，質量又要求多多
我試過晌大家拿嘅一蚊店度買條毛巾，加幣個半銀錢一條
老味度賣幾錢一條就唔知嘞

Walmart 點解咁掂，就因為佢哋採購量大，可以鏈到供應商出汁
大陸廠家諗住薄利多銷，碼住 Walmart 呢種大客戶，攞到長期大訂單就唔憂冇工開
比如一件 T 恤出廠價 10 蚊人仔，去到 Walmart 手賣 20 蚊美籠一件
耐唔耐做下大減價速銷， 20 蚊減到10 蚊 8蚊
老味班窮鬼仲以為執到寶

民生日用品就係咁
床破針對老中嘅進口貨唔係日用品，係高科技嘅產品
不過，我覺得老味嘅商家佬唔會死錯人
佢哋買老中嘅產品唔係因為有交情，純粹係利字當頭
佢哋嘅利潤空間冇100% 以上，你去做嘞
所以加 25%關稅 （ 係進口商負責 ），只會俾老味商家佬攞嚟做借口向大陸廠家鏈價
如果大陸廠家企硬，老味商家佬除非拉閘唔做生意
否則佢哋冇幾多選擇
你話佢哋轉去買歐洲貨丶日本貨得唔得 ？
唔係唔得，你首先要歐洲日本有呢種貨，交貨期保證到
最重要係價錢怕者唔只貴 25% 咁少，可能係以倍數計

所以，都係拭目以待後果

飛毛腿

床破又要加碼嘞
老味公佈一份清單，話要向老中向老味出口產品，數額為 2,000億美籠商品加徵 10%關稅
老床之前講過， 加老中 500億美籠進口商品 25%關稅，老中唔准報復
否則加碼再向2,000億美籠商品
只准捱打唔准還手 ？ 老中真係咁軟弱，咁以後唔駛晌地球立足都得嘞
老床又講過，如果再加碼，老中唔屈服要報復，咁就再加徵額外2,000億美籠商品關稅
真係大家鏈到底，中美貿易額可能歸零
不過，以老共嘅作風，應該有預案作幾手準備
中美貿易歸零嘅局面都預算在內

表面睇，老中好似處於劣勢
表面數據，老味 GDP 係世界第一，老中第二
但 IMF （國際貨幣基金組織）用 購買力平價 PPP 計
老中嘅 GDP 早已經超過老味 ～ 不過老中唔承認，呢個老大位置都係俾老味坐算嘞
工業產值同工業產能嘅世界第一同樣係老中
而商品零售額於 2017年，老中亦超過非常接近老味，就算唔係世界第一都差唔幾
～ 暫時都查唔到究竟超越老味未，可能老中故意唔肯做世界第一
但網絡消費零售就揞唔住，佔世界電子商貿 40%，穩居世界第一

咁就有 D 尷尬，世界經濟老二 （ 老味 ）要打老大 （老中 ）
當然，老味覺得自己本錢雄厚，自己係出錢買嘢嘅買家，出錢嘅就係大爺
只不過，老中自己都係出錢買嘢嘅大爺之一喎
只係有一個假象，老味向中國輸出商品只有 1,300億美籠
而老中向老味輸出商品高達 5,000美籠
所以老床覺得自己好蝕底
老中輸出老味嘅商品其實唔係通通都係老中嘅企業
好似 iPhone， 晌中國組裝，成品輸出老味，輸入老味度嘅價值卻以成品價計算
仲有好多其實港商台商韓商美商，晌大陸設廠生產或組裝，製成品輸血老味度
呢 D 通通入老中數，當係老中賺哂老味嘅錢
我就唔信老味嘅商務部唔清楚呢 D情況
只不過老床佢哋就話我唔聽丶我唔信，總之你就賺我錢，我好蝕底

飛毛腿

對住老味呢種不知信用丶道義丶公正為何物，冇是非黑白觀念嘅強盜
係冇道理可講嘅
你咪以為對老味妥協，我讓你一尺，你起碼敬我一寸啩 ？
你咁諗就錯嘞

記唔記得3月下旬，老床話要向進口老味嘅鋼鋁加徵關稅
數額比老中大得多嘅有好多國家，老中甚至唔入前 10名
泡菜國係前 10名國家之一
頂咗 5 日， 泡菜國就向老味契爺跪地求饒
老味將美韓自由貿易協議修改，以前簽嘅唔算數
泡菜佬割肉求饒 ～ 例如同意進口老味汽車數量增加一倍，自己出口俾老味嘅鋼鐵減 30%

泡菜佬以為咁樣割肉，可以忍辱偷生
點知過咗唔夠兩個月，老味舉起大刀，一刀斬向泡菜佬
老味向泡菜國幾間鋼鐵公司徵收反傾銷稅
其中向泡菜國嘅 Nexteel 徵收 75.81% 反傾銷稅，向世亞鋼鐵公司收 6.75%反傾銷稅 ～ 友情價嘞，唔好阿之阿左
嗱，呢 D 係反傾銷稅，同果 D 加徵進口關稅唔同性質，咪話我反口呀

泡菜佬 ： 契爺，我冇傾銷喎，點解要罰我 ？
老味 ： 因為你呢 D公司唔積極提供資料俾我哋，幫助我老味政府調查
泡菜佬 ： 契爺，唔積極提供資料 ？ 但都有提供資料下話 ？
老味 ： 再囉唆就再罰 。。。。。

冇幾耐，床破又諗到有 D 嘢唔妥 ： 泡菜國輸入老味嘅洗衣機同埋光伏電池組件太多嘞，應該要加稅
呢次，泡菜佬忍無可忍，要向老味報復，向同等數額 4.8 億美籠老味進口貨品加徵關稅
泡菜佬宣佈要向老味契爺施加報復關稅幾日後
床破 ： 你想作反 ？ 好，向泡菜國生產嘅鋼鐵產品徵收 25% 高額關稅

泡菜佬即刻下跪 ： 契爺，我哋講下笑咋，點敢向你徵收乜叉嘢報復關稅吖，果條躝癱亂咁噏，我返去打鑊佢
於是泡菜佬嘅所謂報復性關稅就隨風而逝
4月 30日， 老味宣布取消向泡菜國 鋼鐵產品徵收 25% 高額關稅
泡菜佬 ： 睇下， 契爺會錫住我哋嘅

5月 1日，老味決定向五個國家嘅特定鋼鐵產品徵收反傾銷稅
泡菜國榜上有名， 稅率位列第二 ， 41.1 %
泡菜佬 ：  

飛毛腿

中興好似就係衰呢個比美國禁運~~
tigth123 發表於 2018-7-12 02:35 PM

中興高層真係人頭豬腦
俾老味抽秤佢哋嘅時候，請咗一條老味右軚佬律師做公司嘅法律顧問應付老味嘅調查
呢條右軚佬將接觸到嘅中興內部機密資料交哂俾老味政府
中興就係咁含包散

不過呢，以老味超級強大嘅間諜網同監控資金流向能力
冇呢條右軚佬都會有其他渠道搜集到證據
好似法國巴黎銀行丶揸兜銀行一樣中過招